Federata e Angleze e Futbollit, (FA) ka ngritur akuzë kundër lojtarit të Atletico Madrid, Kieran Trippier.
Lojtari i kombëtares së Anglisë, është akuzuar nga FA për shkeljen e rregullave të basteve, bën të ditur ‘Sky Sports News’. Akuzat kanë të bëjnë me pretendimet e basteve rreth transferimit të Trippier nga Tottenham tek Atletico Madrid, në korrik të vitit 2019.
“Kieran Trippier është akuzuar për sjellje të gabuar në lidhje me shkelje të pretenduara të Rregullave të Basteve të FA, veçanërisht në lidhje me rregulloren E8 (1) (a) (ii) dhe Rregulloren E8 (1) (b) , gjatë periudhës korrik 2019. Ai ka kohë deri më 18 maj 2020 për të dhënë një përgjigje”, thuhet në një deklaratë të FA.
Ndaj këtyre akuzave ka dhënë reagimin e tij vetë futbollisti i cili është shprehur:
“Kam bashkëpunuar plotësisht me invistigimin e FA përgjatë muajve të fundit dhe do të vazhdoj të bëj kështu. Dua të bëj të qartë se ndërsa jam një futbollist profesionist, në asnjë moment të caktuar nuk kam vendosur asnjë bast që ka të bëjë me futbollin dhe gjithashtu nuk kam marrë asnjë benefit financiar”.
Trippier, 29-vjeç, u transferua te Atletico Madrid nga Tottenham në 17 korrik 2019 për shifrën e 23 milionë eurove.
