Që prej largimit të Cristiano Ronaldos nga Real Madrid, emri i Marcelos shpesh është lidhur me Juventusin.
Ditën e djeshme, braziliani, ka hedhur dritë mbi dëshirat e tij për të ardhmen si futbollist duke iu përgjigjur kështu thashethemeve që qarkullojnë muajt e fundit.
Gjatë një transmetimi “live” në Instagram me Fabio Cannavaro, 31 vjeçari tha: “I kam dëgjuar që dy vite më parë ata që thonin se kisha nënshkruar me Juventusin, se nuk jetoja dot pa Cristiano. Njerëzit kanë shpikur kaq shumë gjëra, por është bukur të dini se tifozët e Juventusit e duan vërtet këtë gjë”.
Marcelo rithekson dëshirën e tij për të mos ndryshuar fanellë në një afat të shkurtër, duke vendosur edhe disa dyshime mbi interesin e vërtetë të “Zonjës së Vjetër” për të: “Unë nuk dua të largohem nga Real Madridi, mendoj se nuk do të më lëshojnë. Këtu jam shumë mirë, pastaj nuk e di nëse Juve më kërkon me të vërtetë”.
Braziliani tregon për admirimin për ish-partnerin te, Ronaldo, çka ka mbetur e pandryshuar: “Zgjedhja më e mirë është e vështirë… Unë kam luajtur me Cristiano për dhjetë vite, është më i miri për motivimet që ju jep në fushë, për atë që bën, për mënyrën se si flet. Fatkeqësisht, të dyve na mungon Kupa e Botës”.
