Nënpunësi i i Gjendjes Civile në Koplik të Malësisë së Madhe edhe ish-Drejtori i shkollës së Mesme Pyjore në Shkodër janë vënë në pranga nga policia e Shkodrës.
Burime zyrtare bëjnë me dije se është arrestuar shtetasi E.R., 60 vjeç, nëpunës i zyrës së Gjendjes Civile në Njësinë Administrative Koplik, Bashkia Malësi e Madhe. Ai dyshohet se duke shpërdoruar detyrën, ka pajisur një shtetas me certifikatë me të dhënat e një shtetasi tjetër.
Në pranga është vënë dhe shtetasi A.Ç., 41 vjeç, ish-Drejtor i shkollës së mesme pyjore në Shkodër, për veprat penale “Shpërdorimi i detyrës” dhe “Falsifikimi i dokumenteve shkollore”.
Ky shtetas në detyrën e Drejtorit, në vitin 2019, pas përjashtimit nga shkolla të nxënësit Z.L., i ka vendosur nota kaluese në lëndët e semestrit të dytë të klasës së 11-të, duke i dhënë klasën e 11-të këtij nxënësi, edhe pse ishte përjashtuar në mars 2019, si dhe është pasqyruar pa mungesa në regjistër, me qëllim që ai të përfundonte vitin shkollor në muajin qershor 2019, njofton policia.
Gjithashtu mësohet se ka filluar procedimi penal në gjendje të lirë, për veprën penale “Shpërdorimi i detyrës“ edhe për dy mësueset A.T. dhe B.L., pasi nga veprimet e para hetimore që janë kryer në shkollën e Mesme Pyjore Shkodër ka rezultuar se ato u kanë vendosur nota kaluese nxënësve të përjashtuar nga kjo shkollë.
Materialet procedurale i kaluan Prokurorisë, për veprime të mëtejshme.
