Pasi la skuadrën e Partizanit në janar të vitit 2020, Realdo Fili, provoi të spikaste më disa skuadra, si Kamza, Skënderbeu apo Luftëtari por pa shumë sukses.
Merkatoja e janarit u pa si momenti i duhur për 23-vjeçarin për të shfaqur vlerat në një kampionat më cilësor se ai shqiptar ku u transferua te ekipi rumun, Botoshaniku.
Duke folur për emisionin FanZone në Supersport, Fili, ka deklaruar se po pret me padurim rinisjen e kampionatit, pasi mundësinë e debutimit për Botoshanik, ia hoqi përhapja e coronavirusit.
“Nga momenti që u transferova atje, e prisja me padurim të luaja. Sapo me erdhi përgjigjja për të debutuar, u pezullua kampionati për shkak të Koronavirusit. Të gjithë në formë batute po më thonin se jam shumë i pafat. Fati është pjesë e lojës. Unë kam një karakter që luftoj shumë për të arritur suksesin. Kam shkuar te Botoshani dhe jam gati të jap maksimumin dhe kam shumë besim te vetja. Klubi po mundohet të gjejë mënyra të ndryshme të na kthejë në Rumani, pasi në 15 maj mund të rinisim kampionatin. Atje do të rifillojë shumë shpejt kampionati, pasi janë vetëm 8 javë për tu luajtur.”
Nostalgjia për Partizanin: A do të rikthehesha? Mendoj se i kam lënë vetes një derë të hapur dhe do ta pranoja rikthimin aty. Partizani është si një shtëpi e dytë për mua.
Botoshani, trampolinë: Në momentin e parë që m’u propozua oferta, kisha edhe dy ekipe të tjera që me kërkonin dhe ishin më të mëdha. Por zgjodha këtë ekip, pasi e shikoj si trampolinë për të ardhmen. Për momentin duhet të përmirësoj gjëra që i kisha si mangësi në Shqipëri. Duhet të punoj për të kaluar në një kampionat më të fortë, pasi mendoj se i kam mundësitë.
