Ditën e djeshme, ministri italian i Sportit, Vincenzo Spadafora, deklaroi se nuk ka garanci të plotë për rikthimin e Serisë A.
Këtë ai e argumentoi me faktin që protokollet e sugjeruara nga Federata Italiane të Futbollit, nuk janë të mjaftueshme për garantimin e sigurisë së futbollistëve.
Mbi këtë lajm ka reaguar, drejtori teknik i klubit të Lazios, Igli Tare. Duke folur për radion zyrtare të klubit kryeqytetas, ish-sulmuesi i kombëtares shqiptare, ka hedhur akuza ndaj Spadaforës duke thënë se ai nuk dëshiron të ndihmojë futbollin.
“Dje dëgjova Ministrin e Sportit duke thënë që ai respekton shëndetin e lojtarëve, por në të njëjtën kohë ai i ka dhënë mundësinë futbollistëve të stërviten në parqe publike në mesin e njerëzve ku distanca e sigurisë mund të mos respektohet. Kemi qëndruar për dy muaj pushim, nuk e di se çfarë ka në mendje Ministri, nuk e di cili është qëllimi i tij. Ai sigurisht nuk dëshiron të ndihmojë futbollin, ai nuk dëshiron që ne të luajmë . E them këtë me përgjegjshmëri dhe me vetëdije për situatën e vështirë që kemi kaluar dhe me të cilën do të duhet të përballemi. Duhet të jesh shumë i kujdesshëm, por këtu ka diçka të gabuar”.
