Sekretari i Përgjithshëm i FSHF-së, Ilir Shulku, ka deklaruar në “Ora News” se në drejtim të Ministrisë së Shëndetësisë dhe të Sportit është bërë zyrtarisht një kërkesë për rifillimin e kampionatit në vend.
Për momentin institucioni qeverisës i futbollit shqiptar, ka plan vetëm sa i përket hapit të parë; lejimi i lojtarëve të kryejnë seancat stërvitore stërvitjes, edhe aty duke mos u ndalur në detaje e duke treguar distancimin social si të vetmin kriter.
“Ne kemi bërë një kërkesë Ministrisë së Shëndetësisë dhe të Sportit për rifillimin e kampionatit. Hapi i parë që kemi kërkuar ishte hapja e seancave stërvitore. Ne mendojmë që në një fushë stërvitore prej 10 mijë metrash katror të stërviten 20 persona, pa pasur kontakte fizike. Të vijnë dhe të ikin me makina personale. Hapi i dytë ishte fillimi i kampionatit, të ulemi me specialistët e ministrive. Deri tani nuk kemi marrë asnjë përgjigje nga to. Qeveria dhe kryeministri ka pasur punë më të mëdha se sporti”, ishin fjalët e Shulkut sa i përket asaj shkrese që është dërguar në institucionet shqiptare.
Sigurisht, ai është i ndërgjegjshëm se as që mund të diskutohet për kthimin e kampionatit me praninë e tifozëve.
“Nëse ulemi të bisedojmë me ministritë, asgjë nuk është e pamundur. Në këto momente kemi kërkuar të luajmë pa tifozë. Kjo mund të jetë shumë e arritshme. Duke marrë parasysh numrin e të infektuarve që ka Shqipëria me vendet të tjera, ne nuk po bëjmë asgjë të jashtëzakonshme. Ne shpresojmë që pavarësisht vendimit të marrë nga qeveria, në lehtësirat e marra të përfshihet dhe futbolli.
Futbolli nuk është si bizneset e tjera, lokaleve dhe dyqaneve. Sporti do kohën e vet. Pavarësisht stërvitjes individuale të lojtarëve, do akoma më shumë punë”, deklaroi Shulku.
