Bosi i Formulës 1, Chase Carey, deklaron se ai planifikon të fillojë sezonin në Austri në muajin korrik, pasi Franca u bë vendi i fundit që shtyu garën e saj.
Organizatorët e Çmimit të Madh Francez, deklaruan sot, se gara e cila planifikohej të zhvillohej më 28 qershor është e pamundur të realizohet, kjo pasi qeveria franceze ka ndaluar të gjitha eventet e mëdha deri në mesin e korrikut.
Gjithsesi, Carey, është shfaqur optimist se F1 do të startojë këtë verë dhe gjithçka do të fillojë në Austri në fundjavën e 3-5 korrikut.
“Ne po parashikojmë fillimin e garave në Europë në muajin korrik, gusht dhe në fillim të shtatorit, i pari zhvillohet në Austri në fundjavën e 3-5 korrikut”, theksoi ai.
“Në shtator, tetor dhe nëntor, ne duhet të futemi, në Azi dhe në Amerikë dhe të përfundojmë sezonin në Gji në dhjetor me Bahrein-in para finales tradicionale në Abu Dhabi, pasi të kemi kryer 15-18 gara”.
