Një fanellë e Maradonës të cilën futbollisti e ka veshur 33 vjet më parë me Kombëtaren e Argjentinës, është shitur në një ankand bamirësie për 55 mijë euro.
Këto para do të shkojnë për të ndihmuar qytetin e Napolit në luftën kundër Koronavirusit. Maradona, një simbol i Napolit, falënderoi Çiro Ferrarën, ish-shoku i skuadrës te Napoli, dhe Fabio Canavaron, që bënë të mundur arritjen e një shifre të tillë, e cila do të përdoret për një qëllim të mirë gjatë kësaj periudhe të vështirë për Italinë.
“Ne fituam një ndeshje tjetër, për Napolin dhe Neapolitanët tanë të dashur,” shkroi Maradona në Facebook.
“Ndoshta ishte ndeshja më e rëndësishme dhe ne e fituam së bashku, të bashkuar ashtu si vepruam gjithmonë. Ju falënderoj Çiro, që më dhe mundësinë të ndjej edhe një herë emocionin e të qenurit pjesë e këtyre njerëzve të jashtëzakonshëm”.
“Më bëre të ndjej ulërimën e 80.000 tifozëve të San Paolos. Ndjeva të njëjtën kënaqësi dhe pasion. Jam i nderuar që kontribuova në këtë ndihmë për njerëzit tanë, në këtë periudhë të pashembullt”, ka përfunduar Maradona.
