Fabio Capello është një nga emrat më të mëdhenj të trajningut Italian dhe jo vetëm. Në karrierën e tij, 73-vjeçari ka arritur të drejtojë skuadrat më në zë të botës si Juventus, Milan, Roma, Real Madrid në dy periudha të ndryshme dhe kombëtaret angleze e ruse, duke fituar tituj të shumtë.
Por sigurisht edhe një njeri kaq i suksesshëm si Capello, ai gjithashtu ka pengjet e tij në botën e futbollit dhe një prej e tyre e ka zbuluar gjatë një interviste të fundit. Pengu I tij quhet Antonio Cassano, njëri prej italianëve më të talentuar, por që nuk arriti të përmbushë pritshmëritë në fushën e lojës.
“Pengu më i madh në karrierën time, quhet Antonio Cassano. Më vjen shumë keq që nuk e bëra kampionin që kishte mundësi të bëhej. Jam impenjuar maksimalisht, por nuk ia dola. Fola para pak ditësh në telefon dhe duke parë që e shoqja e ka futur në shina, i thashë me të qeshur se duhej të ishte martuar që në moshën 21-vjeçare”, u shpreh Capello.
