Dy persona në Pogradec kanë thyer masën e sigurisë “Arrest shtëpie”, për t’u konfliktuar me njëri tjetrin.
Bëhet fjalë pë shtetasit: J. P., 26 vjeç, banues në fshatin Buçimas, Pogradec dhe A. P., 38 vjeç, banues në Tushemisht.
Policia e Pogradecit ka arritur të vërë në pranga vetëm 26-vjeçarin pasi personi tjetër ka rritur të largohet menjëherë nga vendngjarja dhe është shpallur në kërkim.
Burime zyrtare bëjnë me dije se në pranga është vënë dhe 15-vjeçari A. P. banues në Pogradec, i cili është kushëri me 38-vjeçarin e shpallur në kërkim. I mituri tentoi të largonte nga banesa e personit të shpallur në kërkim një armë zjarri pistoletë dhe lëndë të dyshuar narkotike kokainë.
“Gjatë kontrollit të banesës së 38-vjeçarit në fshatin Tushemisht, Policia ka kapur në flagrancë kushëririn e tij të mitur, i cili ishte urdhëruar nga shtetasi i shpallur në kërkim, për t’i larguar nga banesa një armë zjarri tip pistoletë me municion dhe një sasi prej 47 gr. lëndë të dyshuar narkotike kokainë, të cilat iu sekuestruan në cilësinë e provës materiale.” thuhet në njoftimin e policisë.
Vijon puna për kapjen e 38-vjeçarit, A. P.
Materialet në ngarkim të tyre i kaluan Prokurorisë së Rrethit Gjyqësor Pogradec për veprat penale “Prodhimi dhe shitja e narkotikëve”; “Mbajtja pa leje dhe prodhimi i armëve dhe i municionit”; “Largimi i të burgosurit nga vendi i qëndrimit” dhe “Kanosja”.
