Ish-trajneri i Napolit, Zdenek Zeman, ka deklaruar se sulmuesi, Lorenzo Insigne, është lojtari i fundit që simbolizon klubin në Serie A dhe gjithashtu e ka quajtur shtatshkurtrin si lojtarin më të mirë italian.
Pavarësisht se është huazuar shpesh në skuadra si Cavese, Foggia dhe Pescara, Insigne ka mbetur besnik i Napolit që nga dita e parë kur iu bashkua klubit në vitin 2010.
“Lorenzo është simboli i fundit i klubit për mua. Ai është futbollisti më i mirë italian, një nga të rrallët që mund të bëjë diferencën.
“Ai është një napolitan që ndjehet si një I tillë dhe shpresoj se ai do të mbetet në qytetin e tij, ashtu siç bëri Francesco Totti.” – ka thënë trajneri çek.
Zeman u caktua si trajner i Napolit në sezonin 2000-01, por zgjati në këtë post vetëm 8-të ndeshje. Nga ana tjetër Insigne, u bashkua me Napolin në vitin 2010 si një 18-vjeçar dhe deri atëherë ka zhvilluar 334 ndeshje dhe ka shënuar 86 gola.
