Tashmë duket të jetë vërtetuar teoria se koronavirusi nuk prek vetëm njerëzit, por edhe kafshët. Media e njohur amerikane, “NBC News” bën me dije se në SHBA janë konfirmuar dy mace pozitive me virusin COVID-19.
Dy macet e testuara po përjetojnë shenja të buta të virusit dhe pritet që ato të shërohen në ditët në vijim. Dyshohet se macet mund të jenë infektuar nga njerëzit e familjes që janë kujdesur për to, të cilët mund të kenë vuajtur vetë nga simptomat e koronavirusit.
Gjithashtu raportohet se në New York kanë rezultuar pozitivë edhe tigrat dhe luanët në kopshtin zoologjik, Bronx.
Sipas autoriteteve, edhe pse kafshët mund ta kapin virusin nga njerëzit, ende nuk ka asnjë indikacion që kafshët mund ta transmetojnë atë tek qeniet njerëzore.
Më shumë se 2,6 milionë njerëz nga e gjithë bota janë prekur nga virusi vdekjeprurës, ndërsa mbi 187 mijë persona kanë humbur jetën.
