Komiteti Ekzekutiv i UEFA-s vendosi sot të shpërndajë rreth 70 milionë euro për klubet të cilët kanë dërguar lojtarë në kombëtare duke kontribuar kështu garat e ekipeve kombëtare të organizuar nga UEFA.
Kjo pagesë fillestare duhej të paguhej pas play-off-it për Kampionatin Evropian, por, me turneun tani të pezulluar deri në vitin 2021 dhe ato ndeshje që nuk do të zhvillohen, UEFA ka vendosur të shpërndaje fondet më shpejt, për të ndihmuar klubet gjatë krizës aktuale financiare të shkaktuar nga pandemia e koronavirusit.
“Komiteti Ekzekutiv i UEFA vendosi sot të shpërndajë menjëherë pagesat e përfitimeve të klubve në lidhje me kontributin e tyre në garat e ekipeve kombëtare të organizuar nga UEFA. Ky vendim vjen gjatë vështirësive financiare që shumë klube po përballen në të gjithë Evropën,” lexohet në një deklaratë të UEFA-s.
Kështu 50 milion euro do të shkojnë për klubet që kanë dërguar lojtarë në 39 kombëtaret që morën pjesë në fazën eliminatore.
17.7 milion euro do të ndahen mes klubeve që kanë dërguar futbollistë në 16 kombëtaret që do të merrnin pjesë në play off-et e Kualifikuesve të Evropianit.
2.7 milion euro shkojnë për lojtarët që do të marrin pjesë në duelet e play-off gjatë vjeshtës, aty ku përfshihet edhe Kosova, që do të përballet me Maqedoninë e Veriut në fazën gjysmëfinale të Nation League.
Skuadrat shqiptare që do të përfitojnë nga ky fond janë Partizani dhe Laçi. “Të Kuqtë” kanë dërguar Lorenc Trashin dhe Alban Hoxhën në kombëtare, ndërsa Laçi portierin Gentian Selmani, i cili tashmë luan në Turqi me Menemenspor.
UEFA dhe ECA (Shoqata e Klubeve Evropiane) kanë një fond total prej 200 milion eurosh në dispozicion të klubeve të futbollit, ndërsa do të shpërndahen edhe 130 milionë euro.
https://twitter.com/UEFA/status/1253298781883416578
