Kryedemokrati Lulzim Basha ka komentuar raportin e Raporterëve “Pa Kufij” për lirinë e medias. Në renditje Shqipëria zë vendin e 84, Kosova të 70-të. Shqipëria sipas Reporterëve Pa Kufij, është më keq se një vit më parë, duke u renditur 2 vende më keq. Në një deklaratë për mediat, Basha thotë se “nismat e qeverisë përkeqësuan lirinë e medias në Shqipëri“. “Ai që ka frikë nga fjala e lirë është armik i demokracisë“, thotë Basha.
Deklarata
Shqipëria është përkeqësuar dhe ka rënë më poshtë në indeksin e lirisë së medias! Kjo ka ardhur si pasojë e nismave të qeverisë për të censuruar fjalën e lirë e ushtruar presion ndaj atyre që denoncojnë korrupsionin, lidhjet e politikës me krimin dhe abuzimet me fondet publike.
Ai që ka frikë nga fjala e lirë është armik i demokracisë. Ai që përditë nëpërkëmb dhe ofendon gazetarët, duke kërcënuar ata që mendojnë ndryshe e denoncojnë aferat korruptive, ai përditë largon gjithnjë dhe më shumë vendin dhe shqiptarët nga standartet europiane.
Censura, dhuna dhe autocensura në një vend që pret për antarësim në Bashkimin Europian, i shtohen panoramës së hidhur të krimit dhe korrupsionit që kjo qeveri servir në tryezën e ligjvënësve europianë.
