Koronavirusi i ri pësoi mutacion në 30 variacione të ndryshme, të cilat mund të kenë komplikime fatale për pandeminë. Kështu thuhet në një studim të Universitetit Zheijiang në Kinë, raporton Daily Mail.
Variacionet e virusit brenda Kinës ishin më të rrezikshme. Ato ngjajnë me virusin që u shpërnda nëpër Europë. Ndërkohë, variacionet më të buta të virusit duket se janë shfaqur kryesisht në SHBA.
Autorët e këtij studimi thonë se kjo tregon për herë të parë se mutacioni i virusit mund të ketë ndikim te ashpërsia e sëmundjes.
Studimi kinez thotë se mutacioni më i ashpër i virusit u gjet në qytetin e tyre, por edhe në disa vende të Europës, si në Spanjë dhe në Itali.
Prej kohësh ka spekulime për mutacionin e virusit dhe shpejtësinë me të cilën ndodh ky ndryshim. Po ashtu ka dyshime se këto mutacione mund ta vështirësojnë gjetjen e një vaksine. Pavarësisht kësaj, studimi në fjalë nuk është rishikuar akoma.
