Në këtë periudhë izolimi, shumë futbollistë dhe ish-futbollistë kanë zgjedhur rrjetet sociale për të komunikuar me njëri-tjetrin apo për t’iu përgjigjur pyetjeve të tifozëve.
Aktiv në rrjetet sociale ka qenë edhe Totti, i cili është shfaqur shpesh herë në bashkëbisedime me miqtë e tij.
Së fundmi legjenda e Romës, në një bisedë live me ish-sulmuesin Luca Toni, ka treguar se tërheqjen nga futbolli ia kishin imponuar në një moment jo të duhur.
Totti më pas tregoi se ka prishur tërësisht marrëdhëniet me pronarin e klubit, James Pallotta dhe se pas 30 vitesh histori me Romën, tani nuk futet më as në qendrën sportive në Trigoria.
“Nuk doja të tërhiqesha, pasi isha mirë fizikisht dhe e ndjeja këtë. Natyrisht që nuk mund të luaja të gjitha ndeshjet dhe as nuk e pretendoja këtë, por kur zbrisja në fushë, e ndjeja që isha mirë, vrapoja dhe ndihmoja skuadrën shumë”.
“Kur mendoj se pas 30 vitesh histori me Romën, nuk mund të futem as në Trigoria, ndonjëherë më vjen të qaj. Shkoj çoj tim bir atje dhe rri jashtë kangjellave, ku takoj edhe miqtë e shumtë që kam. Megjithatë nuk mund të hyj aty, të paktën deri sa të jetë Pallotta te Roma”, deklaroi Totti.
