Prokuroria nis hetimet për blerjen e votave gjatë zgjedhjeve vendore në Dibër. Zyra e shtypit pranë kryeprokurorit Adriatik Llalla konfirmon nisjen e hetimeve me iniciativë nga Prokuroria e Dibrës, për akuzën “dhënies së shpërblimeve dhe premtimeve” për blerjen e votave.
Drejtues të Prokurorisë së Dibrës bëjnë me dije se këtë të mërkurë kanë regjistruar procedim penal kryesisht pas publikimit në media të pamjeve filmike të disa personave që ofrojnë para në këmbim të votës. Drejtuesit e kësaj prokurorie thonë se deri tani nuk ka asnjë kallëzim nga ana e Partisë Demokratike.
Drejtuesit e Prokurorisë sqaruan se këto pamje filmike do të sekuestrohen si prova materiale e më pas do të verifikohen për të nxjerrë përgjegjësinë penale të çdo personi të përfshirë në shit-blerjen e votës.
