Përfaqësuesi italian në Organizatën Botërore të Shëndetësisë, Walter Ricciardi ka paralajmëruar se një valë e dytë e epidemisë së koronavirusit mund të shpërthejë në vjeshtë.
Sipas tij, do të ketë valë të tjera të këtij virusi, deri kur të krijohet një vaksinë. Ai shton se nuk duhet përshpejtuar me hapjen e qyteteve, përndryshe vala e dytë mund të jetë përpara stinës së verës.
“Një valë e dytë e epidemisë së koronavirusit në vjeshtë, më shumë sesa një hipotezë është një siguri. Deri sa të mos të kemi një vaksinë do të ketë valë të tjera, ose, shpresojmë, vatra të vogla të tjera epidemike. Për këtë, është shumë e rëndësishme të mos përshpejtohet me hapjen e qyteteve. Në rast të kundërt, valën e dytë rrezikojmë ta kemi para verës.
Zgjedhjet e rrezikshme të disa liderëve politikë botërore do të ndikojnë mbi popujt e tyre. Nëse ka pasur shumë viktima krahasuar me të tjerët është sepse vendimet janë marrë ose vonë ose në mënyrë të gabuar.
Shembulli më i qartë është Britania dhe SHBA-ja, ku qeveritë nuk i kanë dëgjuar këshillat e shkencëtarëve dhe kanë reaguar në mënyrë ekstremisht të vonë.
Por, në vende si Koreja e Jugut, Finlanda dhe Gjermania, ku ka një linjë komandimi unik dhe një raport i drejtë mes politikës dhe institucioneve mirëfunksionuese, gjërat shkojnë më mirë”, tha ai.
Më shumë se 2,2 milionë njerëz nga e gjithë bota janë prekur nga koronavirusi, ndërsa mbi 152 mijë persona kanë humbur jetën.
