Në Shqipëri humbasin jetën çdo vit 4600 shqiptarë nga tumoret. Deklarata është bërë nga doktoresha Lida Shosha, e cila tha se janë rreth 8300 raste çdo vit me tumore.
“Jemi në kushtet kur tumoret po bëjnë kërdinë. Po na vijnë rastet me 4 ditë jetë, nuk kemi çfarë t´i bëjmë pacientëve që na vijnë”, tha doktoresha.
Në një lidhje të drejtpërdrejtë me Abcnews, Shosha tha se nuk mundet më që të pengohen pacientët me tumore të dalin nga shtëpitë dhe të kërkojnë ndihmën në spital.
“Tumoret më të shumta janë ato të pulmonit për meshkujt dhe ato të gjirit për femrat. Koronavirusi ka shkaktuar 25 viktima, por luftën e vërtetë e kemi me tumoret.
E dini se çfarë më thonë pacientët: A mund t´a shtyjmë kimioterapinë? Dhe këtë e thonë se kanë frikë të dalin nga shtëpia”, tha doktoresha Shosha.
Sipas saj, është e paimagjinueshme që me karantinën që është vendosur këtyre pacientëve të mos i sigurohet mënyra për të marrë ndihmën mjekësore.
“Janë pacientë që s´mund të presin, po na vijnë në momentet e fundit dhe ne si mjekë kirurgë të specializuar nuk kemi çfarë të bëjmë, nuk po i shpëtojmë dot.
Kjo është lufta e vërtetë, ajo kundër tumoreve. Koronavirusi ka shkaktuar 25 viktima, tumoret po i marrin jetën çdo vit 4600 shqiptarëve.
Dhe nuk janë nga Tirana, por janë nga Korça e plot qytete të tjera që e kanë të pamundur që me kushtet aktuale të vendosura të kërkojnë ndihmë të specializuar”, tha Shosha.
