Aaron Ramsey iu bashkua skuadrës së Juventusit verën e kaluar me parametra zero. Në sezonin e parë te bardhezinjtë, jo gjithçka ka shkuar mirë për uellsianin, teksa duket se ka hasur vështirësi në futbollin Italian.
Gjithsesi në një intervistë për “The Sun”, 29-vjeçari ka folur me tone optimiste për aventurën e tij te kampionët e Italisë, ndërsa thekson se dëshiron të shkruajë historinë me këtë klub.
“Kam zgjedhur Juventusin për të fituar titullin në Serie A dhe për të sfiduar emrat “big” në Champions League. Juventusi është një klub i madh, një ndër më të fortët në Evropë. Kisha edhe oferta të tjera, por më tërhoqi historia e bardhezinjve”.
“Këtu kanë një mentalitet fituesi dhe unë doja të luaja për të fituar trofe. Dua të ndihmoj klubin për të ngritur trofeun e Champions League”.
I pyetur për Ronaldon, ai është përgjigjur: “Ai është një atlet i pabesueshëm, e gjen gjithmonë të parin në palestër, stërvitet fort aty çdo ditë dhe më pas zbret në fushë”, deklaron Aaron Ramsey.
