Në 24 orët e fundit shërbimet e policisë kanë ndëshkuar 41 drejtues mjetesh, 269 shtetas si dhe 5 administratorë lokalesh, në zbatim të masave kufizuese për vënien në kontroll të pasojave që sjellin përhapjen e COVID-19.
Në Lushnjë, uniformat blu kanë dënuar me masë administrative 700.000 lekë, shtetasin O. A.,, pasi ka ardhur nga një vend i prekur nga COVID-19 dhe ka shkelur rregullat e vetëkarantinimit, duke dalë jashtë ambienteve të banesës.
Burime zyrtare bëjnë me dije se 41 drejtues mjetesh janë ndëshkuar me heqje të lejes së drejtimit dhe bllokim mjeti, pasi kanë shkelur urdhrin e ndalim qarkullimit. Autoritetet njoftojnë gjithashtu dhe se 262 shtetas, janë konstatuar duke lëvizur në këmbë apo me biçikleta, pa ndonjë arsye apo emergjencë dhe janë gjobitur me 10.000 lekë. Ndërsa 6 shtetas nuk kanë zbatuar urdhrin për kufizimin e lëvizjeve në parqe dhe zona të gjelbra të hapura, në zonat urbane apo mjedise të tjera publike të hapura dhe janë ndëshkuar me 20.000 lekë dhe bllokim mjeti për 3 muaj.
Në të gjithë vendin janë konstatuar dhe 5 lokale të hapura dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.
Në Kukës është proceduar penalisht shtetasi D. K., banues në Bajram Curri, pasi në këtë qytet u konstatua i hapur lokali i tij, i cili ishte i papajisur me NIPT.
Policia e Shtetit apelon për të gjithë qytetarët që të respektojnë masat kufizuese, për të bërë të mundur parandalimin e përhapjes së COVID-19.
