Ministria e Shëndetësisë përditësoi të dhënat mbi përhapjen e Covid-19 në Shqipëri, ndërsa në 24 orët e fundit janë zbuluar 13 raste të reja nga 233 të testuar.
Referuar shifrave zyrtare, numri total i të prekurve nga Covid 19 ka arritur në 446 pacientë, ndërsa janë kryer në total 3877 testime.
Tirana vijon të mbetet qyteti me përhapjen më të madhe me 215 raste dhe pas saj vjen Shkodra me 57 raste. Ndërkohë qytete të tjera më të prekura janë Durrësi dhe Fieri, megjithëse në këtë të fundit nuk ka pasur raste të reja në të paktën 48 orët e fundit.
Dr. Marjeta Dervishi nga Instituti i Shëndetit Publik tha se betejën me Covid 19 e kanë humbur 23 qytetarë.
Ajo shtoi se gjatë 24 orëve të fundit, 20 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 217.
“Ju informojmë se, në shërbimin infektiv aktualisht janë 41 të shtruar. 6 pacientë janë në terapi intensive, ndërsa 2 prej tyre janë të intubuar.
Në spitalin COVID 2 “Shefqet Ndroqi”, janë 8 pacientë të shtruar.6 pacientë janë në terapi intensive, ndërsa 5 prej tyre pacientë janë të intubuar.
Në dy spitalet COVID aktualisht po marrin shërbim 49 pacientë”, tha dr. Dervishi.
Harta e të prekurve nga COVID-19, në 24 orët e fundit është zgjeruar në Tiranë me 6 raste, Shkodër 5 raste dhe Durrës me 2 raste.
Pjesa më e madhe e rasteve të identifikuara në 24 orët e fundit janë kontakte të rasteve të mëparshme të prekura me COVID-19, ndërkohë që vazhdon procesi hetimit epidemiologjik.
Shpërndarja gjeografike e rasteve pozitive, është si vijon:
– Tiranë 215 raste
– Durrës 41 raste
– Lushnje 6 raste
– Elbasan 15 raste
– Fier 32 raste
– Kavajë 8 raste
– Rrogozhinë 4 raste
– Korçë 17 raste
– Vlorë 5 raste
– Shkodër 57 raste
– Lezhë 14 raste
– Berat 2 rast
– Has 12 raste
– Krujë 6 raste
-Tropojë 4 raste
– Pukë 5 raste
– Mirditë 3 raste
Ministria e Shëndetësisë dhe Mbrojtjes Sociale i kërkon qytetarëve të vijojnë të respektojnë masat e distancimit social.
“Është e rëndësishme që masat e kontrollit të infeksionit të respektohen maksimalisht edhe brenda rretheve familjare duke shmangur vizitat tek të afërmit për çdo lloj arsye, për të parandaluar transmetimin e COVID-19.
Nëse keni shenja të sëmundjes COVID19 telefononi numrin e urgjencës 127. Për çdo pyetje apo informacion rreth COVID19 telefononi në linjën e gjelbër 0800 40 40”, thuhet në deklaratën zyrtare të Ministrisë së Shëndetësisë.
