Sot në mbarë botën të gjithë njerëzit janë të shqetësuar për prekjen nga virusi COVID-19, por me shumë se kushdo janë ata njerëz të cilët vuajnë nga sëmundje të tjera.
Sipas mjekëve është pikërisht kjo kategori që është më vulnerabël. Një nga sëmundjet që gjendet më shpesh në popullatën shqiptare është Diabeti.
Dr. Kristi Xhunga mjek specializant për mjekësi interne në Klinikum Weiden shpjegon se si ndikon COVID të këta të sëmurë dhe pasojat që mund të ketë.
Diabeti mellitus dhe sëmundjet kardiovaskulare janë sëmundjet bashkëshoqëruese më të shpeshta tek personat me një infeksion nga Coronavirus SARS-CoV-2. Pacientët me diabet ose me sëmundje te tjera bashkëshoqëruese (hipertensioni arterial, dislipoproteinemitë, obeziteti) kanë një rrezik më të madh për të pasur një dekurs më të rëndë të sëmundjes gjatë infektimit me Covid-19 dhe për të zhvilluar komplikacione si sindromi e distresit respirator akut (ARDS) ose insufcenza multiorganore. Për shkak të shpeshtësië që ka Diabeti mellitus si sëmundje bashkëshoqëruese do të ishte e dobishme theksimi i disa këshillave në trajtimin e Diabetit gjatë infeksionit me Coronavirus SARS-CoV-2.
Parandalimi i infeksionit tek pacientët me Diabet nëpërmjet një kontrolli sa më optimal të glicemisë (niveli i Glucozës në gjak, kontrolli i HbA1c) dhe të presionit arterial.
Screening për Diabet mellitus tek pacientët e Infektuar në varësi të ecurisë të sëmundjes: kontrolle të shpeshta të Glukozës në gjak, elektroliteve, pH-it, HbA1c dhe të presionit arterial.
Trajtimi i pacientëve të infektuar me Diabet mellitus (të njohur) në varësi të ecurisë të sëmundjes: kontrolle të shpeshta të Glukozës në gjak, elektroliteve, pH-it, HbA1c dhe të presionit arterial.
Në ecurinë normale : terapi me antidiabetikë orale ose vazhdim të terapisë së mëparëshme.
Nëse marrja e ushqimeve është e pamundur: terapi subkutane me insulinë.
Për pacientët në terapi intensive: terapi intravenoze me insulinë.
Qëllimet e terapisë:
-Tek pacientët të cilët nuk janë në terapi intensive: objektivi i Glicemisë 70-180 mg/dL duke shmangur hypoglicemitë
-Vlera e këshilluar e HbA1c <7,5%, duke u bazuar në këshillimet e Shoqatës gjermane të Diabetit (DDG).
-Tek pacientët të cilët janë në terapi intensive: objektivi i Glicemisë 140-180 mg/dL
-Presioni arterial <135/85 mmHg
Me shumë rëndësi për pacientët me Diabet do të ishin edhe disa këshilla të përgjithshme për mbrojtjen nga infeksioni të Institutit Robert Koch (RKI) në Gjermani:
Larje të shpeshta të duarve me sapun (20-30 sekonda)
Të mbahet distancë nga njerëzit e tjerë dhe të mënjanohen turmat e mëdha të tyre.
Gjatë kollitjes ose tështimës të vendoset brryli i krahut përpara.
Mënjanoni sa më shumë prekjet e fytyrës, sidomos pasi keni prekur sipërfaqe të cilat mund të jene të kontaminuara.
Qëndroni në shtëpi sa më shumë që të jetë e mundur, sidomos nëse keni shenja si dhimbje të fytit, tështima, kollë apo temperaturë.
