Nga Boldnews
Në një tender “sekret” të orës së fundit, Ministria e Shëndetësisë ka nënshkruar kontratën me kompaninë “O.ES Distrimed”, për blerjen e 1 mijë tamponëve për testimin e COVID-19, me një çmim disa herë më të lartë se sa vlera normale.
Burime konfidenciale të “Boldnews.al” informuar së mbrëmjen e kësaj të Premteje, Ministria e Shëndetësisë ka vendosur të blejë 1 mijë tamponë me vlerë 85.000 lekë (të vjetra) copa, ndërkohë që çmimi i tyre, në këtë periudhë përllogaritet në rreth 25.000 lekë të vjetra copa.
Pra, me një të rënë të lapsit, Ministria e Shëndetësisë ka vendosur të shpenzojë rreth 50 mijë euro më shumë, të cilat arkëtohen, pa garë, në llogarinë e kompanisë “O.ES Distrimed”.
Ndërkohë, “Boldnews.al” ka mësuar se, brenda pak ditësh, Ministria e Shëndetësisë pritet të lidhë një kontratë, po nëpërmjet procedurës së drejtëpërdrejtë, me kompaninë “Biometrik”, për blerjen e 10 mijë tamponëve për COVID-19, me vlerën 85.000 lekë të vjetra copa (rreth 60 euro/copë).
Edhe në këtë rast, Ministria e Shëndetësisë duket e vendosur për të arkëtuar në llogarinë e “Biometrik” rreth 450 mijë euro më shumë se sa vlera reale e tamponëve.
Kompanitë “O.ES Distrimed” dhe “Biometrik” janë dy ndër kompanitë që kanë fituar më shumë tendera në sektorin e Shëndetësisë, sidomos gjatë drejtimit të ministres Ogerta Manastirliu.
Në një shkrim të publikuar pak kohë më parë, “Boldnews.al” konstatoi se dy kompanitë, të cilat konkurojnë në pjesën më të madhe si bashkim operatorësh me njëri-tjetrin, kanë fituar rreth 35 milionë dollarë tendera, përgjatë periudhës 2015-2019.
Të dhëna mediatike sugjerojnë se “O.ES Distrimed” është fituese e tenderit të drejtëpërdrejtë, të zhvilluar së fundmi po nga Ministria e Shëndetësisë, për blerjen e 240 monitorëve për aparaturat mjekësore që do të përdoren për pacientët e prekur nga COVID-19.
Kontrata për monitorët, ende nuk është bërë publike nga Ministria e Shëndetësisë, pavarësisht se procedura e drejtëpërdrejtë ka përfunduar para një jave.
