Shkencëtarët kanë zbuluar edhe gjashtë koronaviruse të reja që gjenden te lakuriqët e natës në Myanmar.
Këto viruse janë pjesë e së njëjtës familje me virusin SARS-CoV-2 që po përhapet në të gjithë globin.
Megjithatë, sipas studiuesit koronaviruset e reja nuk janë të lidhura gjenetikisht me SARS-CoV-2 ose me dy koronaviruset e tjera që shkaktojnë infeksione të rënda te njerëzit –sindromë akute të frymëmarrjes (SARS), virus i cili shkaktoi pandeminë e viteve 2002-2003 dhe sindromi i frymëmarrjes (MERS).
Studiuesit i zbuluan viruset ndërsa po vëzhgonin lakuriqët e natës në Myanmar si pjesë e një programi të quajtur PREDICT për të identifikuar sëmundjet infektive që kanë potencialin të transmetohen nga kafshët te njerëzit.
Lakuriqët janë të dyshuarit kryesorë, pasi gjitarët mendohet se bartin mijëra koronaviruse që janë ende të zbuluara.
SARS-CoV-2, e cila shkakton sëmundjen COVID-19, mendohet se e ka origjinën te lakuriqët para se të transmetohej te njerëzit.
Sipas shkencëtarëve është shumë e domosdoshme të bëhen kërkime të tjera për të kuptuar nëse këto gjashtë viruse të reja transmetohen tek njerëzit apo jo.
“Shumë koronaviruse mund të mos paraqesin rrezik për shëndetin e njerëzve, por nëse i identifikojmë këto sëmundje më herët tek kafshët atëherë kemi mundësi për t’i parandaluar ato që të kalojnë te njerëzit”, shprehet bashkautori i studimit Suzan Murray.
Kontakti midis njerëzve dhe botës së egër po bëhet gjithnjë e më i fortë. Sipas shkencëtarëve, ajo që bota po përjeton sot nga COVID-19 është vetëm një thirrje për të gjithë ne, se shëndeti i njeriut është i lidhur ngushtë me biodiversitetin.
