Si sot, më 12 shtator 1998, vritet në Tiranë deputeti 35-vjeçar Azem Hajdari. Ish-udhëheqësi i Lëvizjes Studentore të Dhjetorit 1990, që çoi në përmbysjen e regjimit komunist në Shqipëri dhe vendosjen e pluralizmit politik u vra nga një grup i armatosur përpara selisë së PD-së.
Që prej vitit 1999, krerët e Partisë Demokratike kanë përkujtuar vrasjen e Azem Hajdarit në memorialin e ngritur pranë selisë së PD-së, në qendër të Tiranës. Gjithashtu, çdo vit janë zhvilluar edhe vizita në familjen e Azemit.
Por sot duket se selia blu është e përqendruar në zgjedhjet e Dibrës dhe deri tani nuk ka zhvilluar asnjë aktivitet për 18-vjetorin e vrasjes së Hajdarit që është një nga simbolet e Partisë Demokratike.
Vrasja e Hajdarit është cilësuar si “vrasja e shekullit” nga Ismail Kadare. Por edhe pas 18 vitesh detajet e kësaj vrasje të bujshme janë ende të paqarta.
