“Javë të mbarë e të bardhë ju bashkëkombasit e mi”, shkruan Prof. Tritan Kalo, në një postim në rrjetet sociale, ndërsa jep disa hollësi nga puna që bëjnë mjekët këto ditë brenda Spitalit Infektiv në Tiranë shoqëruar me fotografi.
Në vijim Prof. Kalo tregon:
“Duke u kthyer në shtëpi pas një ditë pune në vijën e parë të luftës kundër Sars-Cov2/COVID–19. Jemi në luftë me një armik të padukshëm, tinzar dhe shumë vrastar në Spitalin Covid-1, në shërbimin e Sëmundjeve Infektive në qsut, një ekip mjaft i harmonizuar: mantelbardhësh, imazheristësh, farmacistësh, infermierësh, sanitaresh, barelistësh, shoferësh, forcash të rendit, etj.
Nuk i kemi shkëputur lidhjet për asnjë çast edhe me kolegët tanë të nderuar të Sëmundjeve të Brendshme dhe të Shërbimit të Imazherisë në Urgjencën Polivalente, sepse edhe ata përballen dita-ditës me diferencimin e rasteve të prekura prej këtij infeksioni.
Bashkëpunimi është thelbësor në përballje të tilla shumëdimensionale.
Për çdo sekondë shërbimi i DDD-së në QSUT na gjendet aty, duke u kujdesur për mirëdezinfektimin e mjediseve tona.
Me durim dhe me më shumë vetndërgjegjësim të gjithë ne do t’ia dalim mbanë.
Nuk është sakrificë të qëndrosh në shtëpi, përkundrazi është një faktor i domosdoshëm i triumfit të jetës ndaj vdekjes.
Ditë më të mira do të vinë nëse do të dimë të mirë-përballemi me këtë armik COVID-19. Ju duam shumë!
