Një numër i madh i klubeve në LaLiga, kanë pritur që të arrihet një marrëveshje me këshillin e lojtarëve, përpara se të ndërmarrin hapat e duhur për të luftuar humbjet financiare, me të cilat përballen për shkak të krizës koronavirus.
Sidoqoftë, me sa duket çdo klub duhet të marrë masat e veta individuale, dhe Real Madrid me në krye presidentin, Florentino Perez, tashmë ka filluar të kontaktojë lojtarët e tyre në përpjekje për të sqaruar të gjithë se çfarë po ndodh.
“Los Blancos” janë në një gjendje mjaft solide financiare, por sidoqoftë nga kjo krizë klubi mund të humbi deri në 150 milion euro, duke ndërlikuar edhe merkaton e transferimeve. Kështu në ditët në vijim edhe te klubi “Mbretëror” priten të merren disa masa për të zbutur humbjet, ku edhe një herë futbollistët shihen si mjet shpëtimi.
Nga ana tjetër Barcelona dhe Atletico Madrid e kanë ndjerë më shumë krizën dhe duke parë këto fakte kanë reaguar shpejt duke shkurtuar pagat, metodë kjo që do të ndiqet edhe nga Real Madrid, – raporton “Marca”.
