Profesor Dhimitër Kraja, i cili u rikthye në shërbim në spitalin Infektiv, për të dhënë kontributin e tij në luftën ndaj Covid-19, por që u infektua nga koronavirusi, mësohet se ka lënë mjediset spitalore, pasi gjendja e tij shëndetësore është përmirësuar.
Kraja shërbeu në spitalin Infektiv prej 48 vitesh dhe u rikthye në shërbim për të ndihmuar bluzat e bardha.
Kraja ka rezultuar negativ nga testet që i janë kryer, ndërsa do të qëndrojë i vetëkarantinuar për 14 ditë në banesën e tij.
Mjeku i njohur u infektua rreth 4 ditë më parë nga koronavirusi vetëm pak ditë pasi nisi punën në spitalin Infektiv.
Lidhur me përmirësimin e gjendjes shëndetësore të profesorit Dhimitër Kraja ka reaguar edhe ministrja e Shëndetësisë, Ogerta Manastirliu.
“Lajm i mirë, që më gëzoi pa masë!🙏🏼
Sapo ka lënë Spitalin Infektiv, në gjendje të mirë shëndetësore, prof. Dhimitër Kraja!”, shkruan ajo, duke postuar edhe foton e mëposhtme.
Ndërkohë, Kryeministri Edi Rama në reagimin e tij shkruan “lajm i mirë nga Spitali Infektiv. Sapo ka dalë i shëruar profesor Dhimitër Kraja, i cili si pensionist iu përgjigj i pari apelit për t´u angazhuar në vijën e zjarrit, ku u plagos nga armiku. Jetë të gjatë profesor”.
