Ylli i futbollit, Cristiano Ronaldo është pranë të bëhet atleti i tretë në botë që ka një pasuri që tejkalon 1 miliard dollarë.
Javën e kaluar, portugezi ra dakord të ulë pagën e tij në mënyrë drastike për të lehtësuar situatën financiare të Juventusit në gjendjen e rëndë të pandemisë koronavirus, sidoqoftë duket se kjo është një pengesë e vogël për portugezin në misionin e tij.
Sipas “The Sun” deri në fund të sezonit, 35-vjeçari pritet të ndjekë lojtarin e golfit Tiger Woods dhe boksierin Floyd Mayweather, të cilët janë atletët e vetëm aktiv me një pasuri mbi 1 miliard dollarë.
Një objektiv i çmendur, të cilin ish-futbollisti i Real Madridit do ta arrijë jo vetëm nga paga që përfiton si futbollist, por mbi të gjitha falë imazhit të tij. Ai ka nënshkruar kontrata faraonike me sponsorët më të mëdhenj në botë.
CR7 së bashku me Michael Jordan dhe LeBron James, janë të vetmit sportistë në histori të cilët kanë një kontratë të përhershme me Nike.
Për vitin kalendarik 2019, Cristiano Ronaldo ka fituar 100 milionë euro përmes pagës nga Juventusi dhe veçanërisht nga imazhi dhe bizneset e tij.
