Deputeti i PS-së, Erjon Braçe ka sulmuar FSHF-në, ndërsa përmes një statusi në rrjetet sociale ka kërkuar që nesër në stadium mos të ketë asnjë tifoz. Braçe, i cili njihet si një tifoz i Partizanit deklaron përmes statusit të tij se FSHF është bërë pjesë e mashtrimit.
Postimi i plotë i deputetit Braçe
Ju ftoj të mos shkelim në stadium derisa ata që organizojnë ndeshje të rreme të jenë ndëshkuar e përjashtuar nga futbolli! Këta nuk mund të tallen më me ne! Ne nuk mund të shohim më ndeshje të rreme të organizuara nga këta!
Po i shkruaj këto fjalë me ndjesinë e pabesueshme që të krijon derby i Manchester në futboll natyrisht.
Futbollin bio-siç e dëgjova ta quante një gazetar që i ka dhënë të njëjtin zë, të njëjtat emocione, ndeshjeve të rreme, në kampionatin shqiptar.
Prej tij, ndjesitë të përzihen. Por një gjë e kam të qartë. Pashë një ndeshje të ndershme, të vërtetë. Besimi tek ajo që luhet në fushë është absolut, një nga një çdo javë, deri tek e fundit e asaj gare.
Në Manchester, në Angli. Jo këtu, jo në Shqipëri. Ndaj shkallët e stadiumeve janë më plot se kudo. Ndaj shkallët e stadiumeve janë më bosh se kudo, këtu tek ne.
Nuk ka më besim tek ajo që luhet në fushë! Është e rreme!
Një raport dhe dy vendime të UEFA-s, na treguan dje se në 6 vitet e fundit, kemi qenë kot në stadiume, kemi gëzuar kot, jemi hidhëruar kot, kemi mbështetur kot, jemi zënë kot, kemi qarë prej gëzimit apo hidhërimit kot!
Gjithçka që i kemi dhënë nga shkallët asaj që është luajtur në fushë, ka shkuar kot.
Prej fushës ka ardhur tek ne në shkallë. Një tallje e madhe. Heshtja prej dy ditësh e përgjegjësve, e atyre që organizojnë garën dhe na e shesin atë çdo javë si të ndershme, dhemb shumë.
Kanë heshtur që në maj, kur u dha vendimi i parë, për një çështje për të cilën janë informuar javë pas jave nga UEFA, për 5 vite me radhë.
Edhe UEFA ka humbur besimin tek këta, ndaj vendosi të bëjë publike atë që këtu e mbanin të fshehtë organizatorët.
Tani askush nuk ka më besim tek kjo garë!
E dini pse?
Sepse organizatorët, Federata Shqiptare e Futbollit është bërë pjesë e mashtrimit, të paktën duke heshtur dhe legjitimuar. Kush mendonte distancimin ka qenë i fundit që ka besuar. Kot, edhe një herë.
Nesër luhet java e dytë e kësaj gare.
Ju ftoj të mos shkelim në stadiume! Këta nuk mund të tallen më me ne! Ne nuk mund të shohim më ndeshje të rreme!
*Të gjitha sa lexoni, janë fjalët e një njeriu që e do futbollin, e jeton si shumë ndër ju, me pasionin e atij që do të fitojë po aq sa ata në fushë. Nuk ka lidhje as me politikën dhe as me ekipin e zemrës. Fare. Ka lidhje me dinjitetin e secilit ndër ne që ndjekim futbollin.
