Biznesmen i kafesë, Julian Bregu është arrestuar në një lokal në Sauk nga policia e Tiranës, bashkë me mikun e tij Fatjon Brahja, pasi gjatë një kontrolli në makinën e tyre u gjet 1 kg kanabis.
Biznesmeni Bregu është emër i njohur për policinë, pasi ai denoncoi pak kohë më parë për gjobëvënie, Pajtim Serjanin, mikun e Emiliano Shullazit.
Mësohet se kontrolli në mjetin e tyre u bë pas një telefonate në numrin 112, e cila njoftonte se ata kishin drogë në automjet.
Arrestimi u bë ndërkohë që biznesmeni me mikun e tij ishin duke konsumuar një kafe në Sauk. Pas kontrollit në mjet, u gjet një qese e lidhur me tel në parafrangon e makinës, brenda së cilës kishte rreth 1 kg kanabis.
Por policia dyshon se biznesmenit i është ngritur kurth si hakmarrje ndaj bashkëpunimit të tij për arrestimin e Serjanit.
