Edhe pse shpërthimi i koronavirusit po merr vëmendjen e Botës, pasi është shpërndarë me shpejtësinë e një stuhie, një numër sëmundjesh të tjera po avancojnë.
Rastet e gripit të derrit dhe gripit të shpendëve janë raportuar tashmë në Indi dhe vende të tjera. Ndërkohë, një burrë nga Kina ka rezultuar pozitiv me hantavirus.
Global Times i Kinës ka njoftuar se burri nga provinca Yunnan vdiq ndërsa po kthehej për në provincën Shandong. Ai udhëtonte me autobuz, bashkë me 32 personat e tjerë, që u testuan gjithashtu për virusin.
Sipas Qendrave për Kontrollin dhe Parandalimin e Sëmundjeve (CDC), hantaviruset janë një familje e viruseve të cilat përhapen kryesisht nga brejtësit dhe mund të shkaktojnë sëmundje të larmishme te njerëzit.
Ato mund të shkaktojë sindromën pulmonare hantavirus (HPS) dhe ethe hemorragjike me sindromën renale (HFRS).
Sëmundja nuk është ajrore dhe mund të përhapet tek njerëzit vetëm nëse vijnë në kontakt me urinën, fecen, pështymën e brejtësve, dhe më rrallë nga një kafshim i infektuar.
Simptomat e hantavirusit
Simptomat e hershme të HPS përfshijnë lodhje, ethe dhe dhimbje të muskujve, së bashku me dhimbje koke, marramendje, të dridhura dhe probleme të barkut. Nëse nuk trajtohet, mund të çojë në kollitje dhe gulçim dhe mund të jetë fatale, me një shkallë vdekshmërie prej 38 përqind, sipas CDC.
Ndërsa simptomat fillestare të HFRS gjithashtu mbeten të njëjta, mund të shkaktojnë presion të ulët të gjakut, tronditje akute, goditje vaskulare dhe dështim akut të veshkave.
HPS nuk mund të kalohet nga një person në tjetrin, ndërsa transmetimi i HFRS midis njerëzve është jashtëzakonisht i rrallë.
Sipas CDC, kontrolli i brejtësve është strategjia kryesore për parandalimin e infeksioneve hantavirus.
