Nga Boldnews.al
Dhoma Kombëtare e Përmbaruesve Privatë ka vendosur të pezullojë menjëherë të gjithë kontratat e shërbimit të lidhura me institucionet bankare dhe ato financiare jo-bankare, në kuadër të masave të përgjithshme të marra për përballimin e situatës së krijuar nga pandemia e virusit Cov-19.
Në një Udhëzues, të miratuar në 24 Mars 2020, Dhoma Kombëtare e Përmbaruesve Privatë ka orientuar të gjithë përmbaruesit dhe zyrat përmbarimore në Shqipëri që, gjatë periudhës së pandemisë, të pranohen vetëm një kategori e limituar e kërkesave për ekzekutim.
Përmbaruesit udhëzohen që të pranojnë vetëm kërkesat për ekzekutimin e “gjobave” të vendosura nga autoritetet shtetërore, në zbatim të masave për parandalimin e Cov-19.
Ndërkohë, Udhëzimi u ka lënë liri veprimi për të vlerësuar nëse do të vijojnë të ndjekin gjatë kësaj periudhe kontratat, në të cilat autoritetet publike dhe shtetërore janë në pozitën e debitorit ndaj palëve të treta.
Udhëzimi i Dhomës së Përmbaruesve
Në bazë të Udhëzimit, Përmbaruesit udhëzohen që, përgjatë periudhës së pandemisë:
1. Të pranojnë vetëm kërkesat për ekzekutim, të cilat pasqyrohen si detyrim i treguar në neni 11 të ligjit 20/2019 “Për shërbimin e përmbaruesit gjyqësor privat”, si edhe kërkesat që mund të vijnë nga organet shtetërore, në të cilat kërkohet ekzekutimi i masave (gjobave), të vendosura për shkak të shkeljeve të rregullave të vendosura si pasojë e pandemisë Cov-19;
2. Pëmbaruesit gjyqësorë të pezullojnë menjëherë kontratat e shërbimit të lidhura me kreditorët bankarë dhe institucionet financiare jo-bankare, për shkak të forcës madhore që imponon pandemia Cov-19.
3. Përmbaruesit gjyqësorë privatë të vlerësojnë vijimin dhe/ose pezullimin e kontratave të shërbimit, të lidhura me persona fizikë dhe/ose juridikë, ku debitorë janë institucionet shtetërore.
Krahas këtyre Udhëzimeve specifike, Dhoma Kombëtare e Përmbaruesve kërkon nga të gjithë anëtarët e saj që të zbatojnë me përpikmëri rregullat e vendosura nga autoritetet për parandalimin e përhapjes së virusit.
Dhoma e Përmbaruesve është nxitur për hartimin e këtij Udhëzimi, ndër të tjera, edhe si një formë për të ndihmuar anëtarët e saj, që të minimizojnë kontaktet me qytetarët, për shkak të aktivitetit të tyre të përditshëm.
Udhëzimi i Dhomës Kombëtare të Përmbaruesve Privatë vjen në përgjigje të Udhëzimit nr.5, datë 19 Mars 2020, të Ministrisë së Drejtësisë “Për marrjen e masave të veçanta nga përmbaruesit gjyqësor privat për mos përhapjen e infeksionit të shkaktuar nga Covid-19”.
