Kur Giovanni u punësua në një supermarket në Bolonjë, nuk e priste që një ditë të ishte në vijën e parë të një krize globale.
Por tani ai përballet me rrezik për jetën sa herë që u dorëzon diçka klientëve dhe thotë se punëdhënësi i tij nuk e ka pajisur siç duhet me mjete mbrojtëse për të luftuar betejën kundër pandemisë së koronavirusit.
“Në arkëtarëve na u dhanë maska vetëm një javë më parë dhe ne duhej t’i marrim me vete dorezat”, tha Giovanni, i cili kërkoi të mos përdorin emrin e tij të vërtetë për shkak të frikës nga humbja e punës në Conad, një nga zinxhirët më të mëdhenj në Itali. Ai shtoi se punëtorët duhej të kërkonin vazhdimisht maska nga punëdhënësit. “Është detyra e tyre të na mbrojnë”, thekson ai.
Punëtorët e supermarketeve si Giovanni, e kanë gjetur veten duke u përshtatur në marrjen e një roli strategjik të domosdoshëm për mbijetesën kombëtare. Vetëm në Itali, mbi 5000 mijë njerëz kanë humbur jetën, duke tejkaluar numrin zyrtar të Kinës për vdekje të enjten.
Dyqanet ushqimore janë ndër të vetmet dyqane që lejohen të qëndrojnë të hapura në pjesën më të madhe të vendeve europiane, përveç farmacive. Në shumë vende të tjera të BE-së, punëtorët e supermarketeve flasin për rreziqe të ngjashme: sindikatat thonë se punonjësve u mungon mbrojtja e nevojshme sanitare dhe po punojnë jashtë orarit.
Ky rol i ri për punonjësit e supermarketeve në frontet e betejës vjen me shumë sfida. Giovanni thotë se punonjësit e supermarketeve ndjehen të papërgatitur, të pambrojtur dhe tepër të mbingarkuar.
Supermarketet thonë se ata janë duke bërë gjithçka që munden. “Ne kemi ndërmarrë një gamë të gjerë hapash për të mbështetur autoritetet publike në përpjekjen për të minimizuar rrezikun e infeksionit ndaj klientëve dhe stafit tonë,” tha në një deklaratë EuroCommerce, një rrjet supermarketesh në BE.
Neil McMillan, drejtori i “EuroCommerce” tha se për shembull dyqanet kanë kufizuar numrin e njerëzve në dyqane, duke u kërkuar klientëve të paguajnë me karta në vend të parave, duke instaluar skanerë shtesë të produkteve ushqimore dhe duke i udhëzuar arkëtarët të lajnë duart rregullisht, si dhe të pastrojnë dhe dezinfektojnë zonën rreth tyre më shpesh se zakonisht. Supermarket gjithashtu shpesh u sigurojnë punonjësve të tyre maska, doreza dhe xhel sanitar – ndonjëherë, siç përmendi Giovanni, një mur xhami për të ndarë punëtorët nga blerësit.
“Një numër i madh i stafit sapo kanë anuluar pushimet, ose kanë punuar jashtë orarit për t’u siguruar që të mos mungojë asnjë ushqim” shtoi McMillan.
Kancelarja gjermane Angela Merkel i falënderoi punonjësit e supermarketeve duke i cilësuar heronj në një fjalim kombëtar të mërkurën. “Ata që rrinë prapa arkave të dyqaneve dhe supermarketeve po bëjnë një nga punët më të vështira”, tha ajo, duke shtuar: “Faleminderit që jeni këtu për bashkëqytetarët tuaj.”
Por punonjësit thonë se nuk është e mjaftueshme. “Mbrojtja që supermarketet kanë premtuar në Francë, nuk janë të vërteta”, tha Amar Lagha, sekretari i përgjithshëm i sindikatës franceze CGT. “Nuk ka maska, nuk ka doreza. Vetëm në ditët e fundit, kanë filluar të marrim dezinfektues”, tha ai.
“Ne i shkruam qeverisë që nëse nuk ka maska të mjaftueshme për t’u dhënë punëtorëve, duhet të mbyllin dyert… Ne nuk do të sakrifikojmë njerëzit, nuk do t’i përdorim si mish për top”, shtoi ai./Politico
