Një tjetër person ka mbërritur në gjendje të rënduar shëndetësore në urgjencën e Infektivit në Tiranë.
Dyshohet se pacienti është i prekur me Covid 19, ose është ndër pacientët e konstatuar më parë me koronavirus, që trajtohej në kushte shtëpie, dhe gjendja e tij mund të jetë rënduar.
Sidoqoftë ky është rasti i 6 që ka mbërritur në urgjencën e Infektivit gjatë ditës së sotme, atje ku po kurohen 49 pacientë me Covid 19, nga 104 që janë regjistruar gjithsej në Shqipëri.
Ndërkohë, pranë Urgjencës së Përgjithshme të QSUT janë ngritur disa çadra, që do të shërbejnë për të kaluar në filtër pacientët që mund të mbërrijnë në këtë spital, për shkaqe të ndryshme shëndetësore.
Në këto çadra çdo pacient do të kontrollohet nga ekipet mjekësore nëse është ose jo i prekur nga Covid 19, përpara se të futet në ambientet spitalore për t´u trajtuar për sëmundjen apo shqetësimin shëndetësor që ka.
Sipas specialistëve, kjo është një masë për të parandaluar përhapjen e virusit mes bluzave të bardha, por edhe pacientëve që ndodhen të shtruar në pacientët që marrin trajtim në QSUT.
