Si të gjithë Ligat e tjera në Europë edhe kampionati shqiptar i futbollit është pezulluar ndërsa rifillimi i saj mbetet një enigmë. Për këtë temë ka folur Sekretari i Përgjithshëm i FSHF-së, Ilir Shulku, i cili ka zbuluar për ABC News për rifillimin e garave sportive ka disa opsione. Shulku bëri të ditur se kalendari I ri do të vendoset në bashkëpunim me klubet.
Në një lidhje direkte me Skype për ABC News, Ilir Shulku ka deklaruar:
“Ne i kemi gati modulet për rifillimin e kampionatit, pasi kemi disa opsione. Përfundimtari do të jepet kur të fillojë kampionati, pasi në atë moment do të llogaritet edhe koha që do të kemi në dispozicion. Në varësi të kohës kemi modulet, që do t’i përshtatim në momentin që do të dalë data e fillimit të aktiviteteve sportive”.
Kalendari i ri? “Në situatën ku ndodhemi mendoj se do të jetë një vendimmarrje kolegjiale. Pa diskutim që ne do t’i pyesim edhe klubet. Në momentin që do vendoset do ua japim 2-3 alternativa. pasi të marrim mendimet e tyre, atëherë do të vendoset kalendari më i mirë i mundshëm, që t’u përshtate klubeve së pari, t’i përshtatet kompeticionit, në mënyrë që të mbarojë kampionati në kohë”.
Në fund, Ilir Shulku refuzon të pranojë opsionin e mbylljes së garës, pasi është optimist se situata do të shkojë drejt përmirësimit. “Nuk është menduar për mbylljen e garës tani. Nuk mendojmë se kjo situatë do vazhdojë pafundësisht. Shpresojmë që kjo situatë të normalizohet dhe të rikthehemi sa më shpejt në jetën normale. Kam dëgjuar edhe opsione të tjera, por më duket më i pamunduri që kampionati të jepet në tavolinë dhe të ndërpriten tani. Shpresojmë që kampionatet të fillojnë shumë shpejt”.
