Këto ditë të frikshme nga përhapja e Covid-19, ku shumë qytetarë janë vetëizoluar në banesa, Entuel Dervishaj ka vendosur ti kalojë ndryshe.
Siç shihet dhe në pamje, Dervishaj ka vendosur të ofrojë muzikë prej së largu e duke e shpërndarë në rrjete sociale për ta sjellë pranë njerëzve.
Ndodhet në Orosh të Mirditës, nën shoqërinë e mikut të tij Jurgen Cara. Plot pasion duket se Dervishaj po luan telat e çiftelisë e Jurgeni e shoqëron me kitarrë. Një duo perfekte për të luajtur tingujt e Bareshës që shumë kush e pëlqen.
Po kush është Entuel Dervishaj?
I lindur në Fushë Arrëz në vitin 1993. Shkollën fillore e ka kryer tek “Pjetër Arbnori” po në të njëjtin vend. Pas arsimit fillor, Entueli vendos të konkurrojë në “Liceun Artistik” të Tiranës. Klasa e pestë për të ishte ndryshe.
Doli fitues dhe nisi një cikël të ri studimesh për Oboe, (instrument frymor). Më tej, po me të njëjtin instrument përfundoi edhe gjimnazin. Jo vetëm kaq. Pas 8 viteve, nisi studimet e larta në “Akademinë e Arteve të Bukura” në kryeqytet, ku përfundoi edhe studimet master.
