Gjatë 24 orëve të fundit policia ka ndëshkuar 74 drejtues mjetesh pasi kanë shkelur urdhrin e ndalim qarkullimit në fashat e orareve të caktuara.
Gjithashtu në zbatim të masave të marra së fundmi, për të parandaluar përhapjen e COVID-19, uniformat blu bëjnë me dije se janë ndëshkuar dhe 8 administratorë lokalesh me nga 100.000 lekë secili, si dhe dy shtetas me masë administrative 700.000 lekë për mosrespektimin e vetëkarantinimit.
Nuk kanë mbetur pa u ndëshkuar as këmbësorët, ku bëhet për 234 shtetas të cilët janë gjobitur me 10.000 lekë secili, pasi nuk kanë respektuar oraret kufizuese për moslëvizjen e tyre.
Policia e Shtetit apelon për të gjithë qytetarët që të respektojnë masat kufizuese, me qëllim parandalimin e përhapjes së COVID-19.
