Nuk i ka penguar as shiu që të mblidhen para kryeministrisë dhjetra maturantë për të protestuar. “Shkollë, punë, liri” ka qenë thirrja e kandidatëve për student. Me parulla në duar maturantët i bëjnë thirrje kryeministrit Rama për padrejtësinë që po u bëhet atyre.
Ata kundërshtojnë formulën e pranimit në universitete dhe reformën në arsimit, pasi sipas tyre ka shkaktuar përjashtimin e shumë maturantëve, megjithëse me mesatare të lartë.
Sipas maturantëve dhe studentëve, ky sistem i ri në arsim favorizon Universitetet private.
Një ditë më parë, Ministrja e Arsimit Lindita Nikolla në përgjigje të ankesave të maturantëve pas daljes së listave paraprake të fituesve në Universitete, tha se kjo është vetëm faza e parë dhe siguroi se asnjë maturant që plorëson kriteret e studimit nuk do të përjashtohet nga sistemi.
Si garanci për studentët, Nikolla referoi sistemin e ri të ankesave dhe numrin e lartë të kuotave që ofrojnë Universitetet.
