Ditën e sotme u mbajt takimi mes UEFA-s dhe 55 drejtuesve të federatave europiane, ku është folur për situatën aktuale në të cilën ndodhemi për shkak të Koronavirusit dhe pezullimit të kampionateve.
Vendimi kryesor që është ai për shtyrjen e Europianit për vitin tjetër, pra në 2021 që tashmë ëeshtë konfirmuar edhe nga UEFA, duke i hapur kështu rrugë kampionateve të pezulluara si dhe kompeticioneve europiane për klube si Liga e Kampioneve dhe Europa Leage të vazhdojnë aktivitetin e tyre deri në fund të qershorit.
Federata Shqiptare e Futbollit ka dalë me një njoftim, ku njofton të gjitha vendimet të marra në video konferencën:
“Qeveria europiane e futbollit, UEFA, thirri sot në mesditë një video-konferencë përmes internetit me të gjitha federatat anëtare. Ky takim i jashtëzakonshëm zhvillohet në një situatë aspak normale për shumë vende europiane dhe më gjerë, nga përhapja e virusit COVID-19. Krahas shumë fushave të jetës në Europë, tashmë ka ndaluar edhe futbolli.
Presidenti i FSHF-së, njëherazi anëtar i Komitetit Ekzekutiv të UEFA-s, Armand Duka, mori pjesë në këtë mbledhje të jashtëzakonshme, dhe mbështeti propozimet e Presidentit të UEFA-s, Aleksander Ceferin.
“Unë uroj që kjo situatë të kalojë sa më shpejt dhe të kthehemi në jetën normale e të shijojmë futbollin. Situata duhet të ndiqet hap pas hapi, dhe të bëjmë më të mirën e mundshme. Mbështes plotësisht propozimet e sotme dhe do të bëjmë maksimumin për t’i realizuar ato”, tha Presidenti Duka në ndërhyrjen e tij në takim.
UEFA përmes kësaj video-konference, vendosi krijimin e një grupi të posaçëm pune për të rakorduar kalendarët e rinj të eventeve vendosur në këtë takim.
Në takim u theksua se UEFA po punon intensivisht për të pasur skenarë në çdo situatë të mundshme që mund të përballet Europa.
Federatat anëtarë pranuan në parim këto propozime të UEFA-s:
Lidhur me ndeshjet kombëtare:
• Shtyrja e EURO 2020 për në muajt qershor-korrik 2021 (11 Qershor- 11 Korrik 2021);
• Ndeshjet ndërkombëtare të marsit shtyhen për në dritaren ndërkombëtare të qershorit 2020;
• Ri-skedulohen ndeshjet e kualifikimeve europiane (që ishin planifikuar për në qershor 2021);
• Do të ndryshojnë datat e kompeticioneve të tjera që ishin planifikuar mes muajve qershor-korrik 2021 si UNL Final4 / EURO U21 / Europiani i femrave;
• Lojtarët do të lejohen nga klubet të marrin pjesë në ndeshjet kombëtare bazuar në ri-skedulimet e reja.
Lidhur me ndeshjet e klubeve:
• Përpjekje maksimnale nga të gjitha garat vendore dhe europiane të klubeve që të mbyllin sezonin më 30 qershor 2020;
• Limitim i hapësirave përgjatë javëve në mënyrë që të mund të përdoren nga ligat kombëtare si dhe UEFA;
• Gjetja e një zgjidhjeje dhe adaptimi të mundshëm për kualifikueset e kompeticioneve të UEFA-s për klubet për sezonin 2020/21 pas përfundimit të ligave dhe sezonit European më 30 qershor të këtij viti.
Federata e Futbollit, ishte ndër të parat në Europë që mbylli dyert e stadiumeve e më pas pezulloi të gjitha garat, si një masë ekstreme por e domosdoshme për të parandaluar përhapjen e virusit COVID-19.
FSHF do punojë ngushtësisht me UEFA-n gjatë kësaj situate të jashtëzakonshme”.
