Dita në Tiranë nisi me injorimin e urdhrit të kryebashkiakut të Tiranës Erion Veliaj, për ndalimin e transportit, si një masë në parandalimin e koronavirusit.
“Bashkia e Tiranës njofton të gjithë qytetarët se nga dita e enjte, datë 12 mars, do të pezullohet shërbimi i transportit publik për një afat të pacaktuar. Për sa më sipër, prej orës 05:00 të ditës së nesërme, këto linja do të ndërpriten deri në një njoftim të dytë: Shërbimi i transportit qytetas; Shërbimi i transportit rrethqytetas; Shërbimi i transportit ndërqytetas ushqyes”, thuhej në njoftim të Bashkisë së Tiranës shpërndarë për mediat mbrëmjen e së enjtes.
Mirëpo, duket se urdhrat e kryetarit të Bashkisë nuk i kanë marrë parasysh pronarët e kompanive të linjave të transportit urban dhe inter-urban në Tiranë. Që në orët e para të mëngjesit, pak pas orës 05:00, disa linja urbane në Tiranë vijonin punën normalisht.
Linja si: TEG-qendër, Senatorium, Astiri, Yzberishti, Autotraktori apo Paskuqani, por edhe linja rreth-qytetase kanë vijuar punën normalisht. Vetëm disa linja duket se kanë vendosur të ndërpresin punën, duke respektuar urdhrin për të shmangur përhapjen e koronavirusit.
Pas lajmeve se linjat e urbaneve vijonin punën, kryeministri Edi Rama njoftoi se shërbimi do ndërpritet në Tiranë e Durrës, nisur nga mesdita.
Ndërkohë, Veliaj u justifikua duke deklaruar se “kush ishte turn i tretë mbrëmë do duhet ta rikthejmë në shtëpi mor shokë sot në mëngjes te fëmijët, për sa kohë s’kish dijeni mbrëmë”.
Qendrat tregtare
Qeveria ka marrë një sërë masash për parandalimin e koronavirusit, mes tyre dhe mbyllja e lokaleve, restoranteve, palestrave, disa shërbime publike, dhe ndalimin e grumbullimit të njerëzve në tubime. Problem megjithatë mbeten qendrat tregtare, ku grumbullimi i njerëzve është I madh dhe kjo situate sjell shqetësim. Në Itali, të gjitha këto ambiente janë mbyllyr, ndërsa autoritet kanë lejuar funskionimin vetëm të dyqaneve ushqimore.
