Shefja e Epidemiologjisë në Institutin e Shëndetit Publik, Eugena Tomini, tha të martën në mbrëmje, gjatë një interviste televizive, se në të gjitha qëndrat mjekësore janë marrë masat e nevojshme dhe janë pajisur me maskat për të minimizuar rrezikun.
Sipa saj, pacientët duhet të bashkëpunojnë me mjekët duke deklaruar kontaktet që të minimizohet përhapja.
“Pacienti duhet të bashkëpunojë me mjekët dhe duhet të deklarojë vetë kontaktet e tij që të minimizohet përhapja. Kjo është shumë me vlerë në këto momente. Ne kemi përforcuar survejancën e kontrollit dhe kemi një sistem të konsoliduar dhe përforcuar aktualisht. Hap pas hapi vendosen masa të tjera për ta përforcuar edhe më shumë këtë survejancë”,- tha Tomini.
Ajo tha më tej se “monitorohemi dhe jemi vlerësuar nga OBSH për laboratorin dhe jemi certifikuar për diagnozat e nxjerra nga ky laborator, që është me të njëjtën ekuivalent që kanë dhe në Gjermani dhe Francë. Janë të standardizuara pra. OBSH na monitoron në ndjekjen e këtyre hapave”.
Tomini vlerësoi edhe punën e gazetarëve dhe kërkoi kujdes. “Unë jo më larg se dje, në një emision paralel vlerësova punën e gazetarëve që janë në linjë të parë. Është shumë për t’u vlerësuar. Siç themi larjen e duarve disa herë, mbajtja e maskës respiratore janë rregulla që duhen zbatuar. Të gjitha rregullat duhen zbatuar, maska nuk ulet gjatë kohës që je duke punuar apo duke intervistuar, pasi nuk ka kuptim sepse një teshtitje, vendosja e maskës e parandalon”,- tha ajo.
“Parashikohet që numri i rasteve të shtohen dhe masat e qeverisë për të minimizuar përhapjen e riskut”,- shtoi Tomimi.
Ajo foli dhe për rastet e prekura. “Që në momentin që shtrohet te infektivi dihet që është për covid 19 dhe ai e ka të qartë këtë situatë. 31-vjeçari është pacienti i dytë dhe ka pasur histori udhëtimi në Bolonja dhe mund të ketë pasur kontakte me persona që kanë pasur covid 19”,- tha Tomini.
