Unioni i Gazetarëve Shqiptarë ka denoncuar rastin e gazetarit Bekim Bici, i cili u dhunua mesnatën e djeshme nga policia e Tiranës. Gazetari Bici ka akuzuar Drejtorin e Përgjithshëm të Policisë së Shtetit, Ardi Veliu, për urdhërin që i dha punonjësve të rednit për t’a shoqëruar në ambientet e Drejtorisë së Policisë në kryeqytet.
Përmes një postimi në rrjetet sociale, UGSH shprehet se shoqërimi i gazetarit është i papranueshëm dhe përbën një presion në detyrë.
UGSH kërkon nga autoritetet e larta të Policisë së Shtetit dhe nga ministri i Brendshëm të hetojnë rastin dhe të zbardhin motivet e këtij shoqërimi.
“Denoncimi publik dhe adresimi i reporterit te Fax News Tv, prane UGSH, përbën një rast flagrant të dhunës dhe presionit të segmenteve të Policisë së Shtetit mbi gazetarin në detyrë. Shoqërimi i reporterit në oret e natës së djeshme dhe presioni verbal mbi të i përfaqësuesve të Policise është i papranueshëm dhe përbën si në asnjë rast tjetër një pengim dhe presion mbi gazetarin në detyrë.
Jemi në pritje të një sqarimi publik dhe kërkojmë hetimin e rastit dhe marrjen e masave ndaj personave përgjegjës ndaj pengimit, presionit dhe shoqërimit të gazetarit që ka qenë në krye të detyrës”, thuhet në reagimin e UGSH-së.
