Dy ndeshjet e Kategorisë Superiore Vllaznia-Partizani dhe Skënderbeu-Kukësi, do të luhen ditën e sotme por pa praninë e tifozëve.
Lajmi është konfirmuar vetë nga Federata Shqiptare e Futbollit, e cila bën me dije se ky vendim u mor pas negociatave me Komitetin e Emergjencës për shkak se ekipet ishin grumbulluar respektivisht në Shkodër dhe Korçë.
Për shkak të parandalimit të koronavirusit qeveria mori vendimin në mëngjes që të anulonte çdo aktivitet sportiv deri në datën 3 prill.
Njoftimi i federatës:
Komiteti i Emergjencës në Federatën Shqiptare të Futbollit është mbledhur ditën e sotme për të vlerësuar situatën pas të urdhërit nr. 132, dt. 8/3/2020 të Ministrisë së Shëndetësisë dhe Mbrojtjes Sociale lidhur me pezullimin e aktiviteteve sportive dhe sociale në vend.
Komiteti i Emergjencës vlerësoi se duke qenë se katër ekipet janë grumbulluar tashmë respektivisht në Shkodër (Vllaznia-Partizani) dhe Korçë (Skënderbeu – Kukësi), të vijojë me zhvillimin e këtyre dy ndeshjeve të javës së 26-të të Kategorisë Superiore, me dyer të mbyllura. Komiteti i Emergjencës në FSHF, i kërkon Këshillit të Ministrave një takim për të diskutuar në detaje lidhur me vijimësinë e aktiviteteve futbollistike në vend.
