Një shtetas shqiptar i shpallur në kërkim është kapur në Itali dhe është ekstraduar nga Milano drejt vendit tonë. Bëhet fjalë për Bashkim Demrozi, 39 vjeç, lindur në Kavajë.
Ky shtetas ishte shpallur në kërkim ndërkombëtar nga ZQK Interpol Tirana, pasi Gjykata e Shkallës së Parë për Krimet e Rënda e ka dënuar me 8 vjet burg, për veprën penale “Trafik i lëndëve narkotike, kryer në bashkëpunim, mbetur në tentativë”.
Pas apelimit, Gjykata e Apelit Durrës, në vitin 2018, e ka dënuar përfundimisht me 6 vjet e 8 muaj burg.
Përmbledhje e ngjarjes së ndodhur:
Në 19 gusht 2014 Bashkim Demrozi së bashku me dy kushërinjtë e tij Muhamet Demrozi, dhe Agim Demrozi, kanë tentuar të trafikojnë drejt Italisë nëpërmjet Portit Detar të Durrësit sasinë prej 330 kg lëndë narkotike canabis sattiva, të ngarkuar në një kamion mallrash. Tre kushërinjtë në bashkëpunim me shtetasin Ermal Lusha, kanë punësuar si shofer kamioni shtetasin F.D., duke i kërkuar këtij të fundit që të udhëtonte drejt Italisë për të marrë arka me verë në një kantinë në Breshia.
Në mëngjesin e datës 19 gusht 2015, shoferi F.D., i shoqëruar nga Muhamet Demrozi, ka udhëtuar fillimisht nga Durrësit në drejtim të Vorës për të marrë kamionin. Më pas, është rikthyer në Durrës dhe, nëpërmjet portit detar, është përgatitur të imbarkohet në tragetin e linjës për në Itali. Gjatë kontrollit policor, në kamion është konstatuar dhe gjetur lënda narkotike dhe për këtë është shoqëruar fillimisht shoferi i mjetit, i cili ka dhënë detajet që më tej u zbardhën gjatë hetimit. Në përfundim të hetimeve dhe më tej në gjykim, rezultoi e provuar se shtetasit Demrozi kanë siguruar lëndën narkotike nga Ermal Lushi dhe, për të realizuar trafikimin, kanë përdorur shoferin F.D., i cili rezultoi të mos kishte dijeni për lëndën narkotike.
Në deklarimet e dhëna, shtetasi Muhamet Demrozi deklaroi se lëndën narkotike e ka siguruar nga një shtetas me emrin “Çimi” dhe është kujdesur vetë për të sistemuar në kamion lëndën narkotike. Gjithësesi, rezultoi e provuar se shtetasi Muhamet Demrozi ka vepruar në bashkëpunim me kushërinjtë e tij, Bashkim dhe Agim, si edhe me shtetasin Ermal Lushi.
