Një ministër i qeverisë është ndërmjetës midis Presidentit Ilir Meta dhe kryeministrit Edi Rama me qëllim për të ulur tensionet mes palëve dhe për të bindur kreun e shtetit të tërhiqet nga vendimi i paralajmëruar për shpërndarjen e parlamentit. Deklarata u bë nga gazetari Arian Çani në emisionin e tij “Zonë e Lirë” mbrëmjen e kësaj të Premteje.
Moderatori i emisionit tha se ministri në fjalë është “Tigri”, epitet ky i përdorur për Arben Ahmetajn, i emëruar nga kryeministri Edi Rama Ministër i Rindërtimit.
Mes kryeministrit Edi Rama dhe Presidentit Ilir Meta marrëdhëniet janë të tendosura prej kohësh. Në manifestimin e 2 Marsit të thirrur nga kreu i shtetit në mbrojtjen e Kushtetutës, Meta paralajmëroi se do të firmosë dekretin për shpërndarjen e parlamentit, nëse nuk ka reflektim nga qeveria dhe Kuvendi, që sipas Presidentit, kanë shkelur Kushtetutën në mënyrë të përsëritur.
