Sipas një studimi të fundit, shumica e personave deri 34 vjeç nuk dinë të ndërrojnë as edhe një llambë elektrike dhe kanë tendencën t’i drejtohen Google-it për ndihmë. Në studim kanë marrë pjesë rreth 2000 të rritur në moshën 25 deri në 34 vjeç (Millennials), të cilët nuk ndjehen të sigurt për të bërë një riparim elektrik ose hidraulik dhe shpesh kërkojnë ndihmë. Gjithashtu edhe shtrëngimi i një vide ishte në pjesën e punëve për të cilat pjesëmarrësit kërkonin ndihmë nga interneti.
Të dhënat treguan se 87 për qind e pjesëmarrësve në studim i drejtoheshin Google-it për të parë se si kryhen punë të vogla brenda shtëpisë. Gjithashtu, 3 prej 10 personave përdornin rrjetet sociale për të parë video të ndryshme se si të kalonin këto momente që ata i quanin “sfida”.
“Rezultatet e sondazhit ishin jashtëzakonisht befasuese, përdorimi i rrjeteve sociale është një moment i madh për tregtarët dhe të gjitha bizneset, mund të postojnë video të ndryshme në rrjetet sociale”, tha Nick Silverwood, shef biznesi në Plusnet, kompani që kishte komisionuar sondazhin.
Gjetjet kanë treguar edhe një fakt tjetër të rëndësishëm. Një e katërta e pjesëmarrësve mendonin të merrnin dikë tjetër për të bërë punët e vogla në shtëpi dhe kryesisht për personat që kërkonin ndihmë nga dikush, personi i parë që merrnin ishte babai i tyre. Disa nga pjesëmarrësit deklaruan se kishin ndenjur më shumë se tre javë pa drita, për shkak se nuk i kishin kërkuar dikujt që të ndërronin llambën e dhomës. Si rezultat këta persona harxhonin rreth 320 paund në vit për të gjetur një person të mirë që mund t’u bëjë atyre punët e vogla në shtëpi.
37 për qind e pjesëmarrësve të anketuar, treguan se kanë një pajisje elektrike dhe hidraulike për detyrat e shtëpisë, ndërsa 17 për qind e tyre kishin një punonjës personal që i kryente këto punë në shtëpi.
