Përfaqësuesi i PD-së për Reformën Zgjedhore, Oerd Bylykbashi, u shpreh sot se opozita e bashkuar ka propozuar që ata që kanë fituar tendera apo koncensione nuk mund të financojnë partitë.
“Është një risi në propozimin tonë që ata që kanë marrë para nga taksat e shqiptarëve, tendera apo koncensione nuk mund të financojnë dhe kush financon subjektet politike, nuk mund të marrë për një periudhë të caktuar tendera apo koncensione nga shteti për të shmangur plotësisht kapjen e partive politike nga oligarkia.
Sigurisht ka dhe masa të tjera që do të pengojnë qartazi që para kriminale apo korruptive të futen në procesin zgjedhor”, tha Bylykbashi, pas tryezës së sotme për Reformën Zgjedhore.
Sipas tij, propozimet e PD, rregullojnë plotësisht financimin e partive dhe financimin në zgjedhje.
“Duhet të jetë një zgjidhje e vetme që garanton që partitë jo vetëm financohen siç duhet, por edhe transparenca të jetë e plotë dhe të mos ketë asnjë mundësi për t’u shmangur.
Ky është qëndrimi ynë dhe do t’i qëndrojmë maksimalisht
Propozimi i opozitës të bashkuar është një reduktim drastik i financimit që merret nga burime private duke e çuar në standarte ndërkombëtare në raportin 66% të financimit nga burime shtetërore dhe 33% nga burime private duke vënë një numër kufizimesh të forta për ata që do të financojnë”, tha ai.
