Sfida mes Juventusit dhe Interit fillimisht u vendos të luhej pa praninë e tifozëve.
Por më pas ditën e djeshme, Liga e Futbollit Italian erdhi me një vendim të ri zyrtar, që e anuloi përfundimisht sfidën ndërsa data kur do të zëvendësohet do të jetë 13 maj.
Në lidhje me këtë situatë zyrtari i lartë i zikaltërve, Beppe Marotta, ka folur për “Gazzeta dello Sport” duke akuzuar hapur drejtuesit e ligës për ndryshimet e shumta dhe të pakuptimta të kampionatit.
“Çështja e koronavirusit nuk u trajtua si duhet, u mor lehtë dhe nuk u menaxhua si duhet. U vendos që të luhej me dyer të mbyllura, ministri e ktheu vendimin duke anuluar ndeshjet. Presidenti i Ligës, Dal Pino, i ka fajet pasi vendosi vetë pa u këshilluar me askënd. E gabuar e gjitha kjo, pasi sjell aludime dhe diskutime të forta. Kjo është arsyeja që kemi kërkuar një këshill të jashtëzakonshëm sot”.
Ndërsa në lidhje me datat e zëvendësimit në muajin maj, Marotta shton: “A rrezikon të mos përfundojë në kohë Serie A? Po. Mendoj se ky kampionat është fals, pasi nuk e kuptoj se pse u vendos që ndeshja ndaj Juventusit të luhet para sfidës me Sampdorian. E pakuptimtë, prandaj mendoj se kampionati është fals. Duhet menduar dhe për gjendjen psikologjike të skuadrave dhe momentin që kalojnë në kampionat”.
